+2 010 0089 6930 info@webbingstone.com Giza, Egypt

قصص التسويق الناجح

التسويق الناجح هو ازاي تعرف احتياجات عملائك وتحققها بس بطريقتك انت. يعني كل ما تكون مختلف كل ما تكون ناجح زي قصة نجاح شركة كيت كات في اليابان وقصة نجاح موقع half.com اللي قدروا بأفكار مختلفة وغير تقليدية يغيروا مشاريعهم بالكامل زي ما هنعرض عليكم

 

العميل هو الأساس

 Nobody cares about your products except you, people care about themselves and how you can solve their problems

العملاء مش بيهتموا بمنتجاتك هما بس بيهتموا ازاي تقدر تحل مشاكلهم بمنتجاتك”. دا كلام خبير التسويق الأمريكي ديفيد سكوت اللي بيقول ان اهم حاجة في التسويق مش أنك تبرز مميزات المنتج بتاعك او مميزات شركتك، لكن تهتم باحتياجات العميل وازاي منتجك ممكن يلبي احتياجاته دي

 

قصة نجاح شركة كيت كات في اليابان

الشعب الياباني هو من أكتر الشعوب اللي مش بتثق في الدعاية والأعلان. وده كان التحدي لشركة شيكولاتة “كيت كات” أنها ازاي تقدر تحقق النجاح وتنتشر في اليابان. و تصادف أن كلمة كيت كات هو قريب جدا من كلمة يابانية “ كيتو كاتسو” ومعناها نتمنى لك النجاح. ومن هنا بدأت خطة كيت كات الغير مباشرة والصبورة أنها تنتشر في اليابان. في السنة الأولى لنزول كيت كات اليابان بدأت الفنادق انها توزع الشيكولاتة على الطلاب مجاناً وكأنها القالب السحري اللي بيجيب الحظ، ومن غير ما يعرف الشعب الياباني أنها هدايا من شركة كيت كات نفسها. وفي السنة الثانية والثالثة بدأت الشركة في تسريب الحكايات والأخبار عن قصص لطيفة عن أمهات وطلاب مع قالب الحظ. كل القصص دي كانت مخترعة بس بدأ يستقر في عقل الامهات في اليابان أن كيت كات فعلا بتجيب الحظ . فبدأوا يبعتوا أولادهم للأمتحانات ومعاهم الشيكولاتة .

وعشان الشعب الياباني بيحب التميز والاختلاف بدأت الشركة أنها تنتج نكهات كتيرة لليابان بس وكانت بتكون لفترة محدودة وبتختفي من السوق عشان تنزل نكهات تانية مكانها، ولحد دوقتي كيت كات عملت حوالي 200  نكهة للسوق الياباني.

نكهات كيت كات في اليابان
نكهات كيت كات في اليابان

قصة نجاح موقع Half.com

قصتنا من سنة 1999 من موقع half.com وكان الموقع محدش بيزوره تقريبا وفشلت كل وسائل التسويق ليه. لحد ما عرف نائب مدير الموقع بالصدفة ان في قرية صغيرة في امريكا اسمها Half way  وكان عدد سكانها 360 نسمة بس. وهنا جت في باله فكره مختلفة وهي انه يتفاوض مع اهل القرية أنهم يغيرو اسمها ل Half.com لمدة سنة واحدة بس مقابل 100 الف دولار و 20 جهاز كمبيوتر لمدرسة القرية، و فعلا وافقوا و أنتشر الخبر وبدأت كل الصحف والمواقع انها تكتب عن الخبر وحقق الموقع نجاح كبير وبعدها ب 3 أسابيع تقدم موقع ebay  المشهور عشان يشتري الموقع ده ب 350 مليون دولار وبقى اسمه Half.ebay.com

 وبعد 18 سنة من النجاح قفل موقع half.com في 31-8-2017  

 half.com قرية
half.com قرية

قدم طرق تسويقية جديدة ومبتكرة

المنافسة بين الشركات في كل المجالات بقيت أصعب، لأن عدد الشركات زاد وأساليب التسويق ليهم كمان بقيت أكتر إحترافية وإبداعية. وعشان أي مشروع يقدر يستمر ويحقق النجاح دلوقتي لازم يقدم طرق تسويقية جديدة ومبتكرة. لكن قبل ما ترسم لنفسك خطة تسويقية لازم تحدد لنفسك إستراتيجية واضحة. بمعنى تحدد مين هما العملاء المستهدفين ليك وتدرس متطلباتهم وسلوكياتهم، وبعدها تبدأ خطتك في التركيز على تلبية احتياجاتهم بمنتجاتك أو خدماتك