أسئلة مهمة اسألها لنفسك قبل البدء في أي مشروع

كلنا عندنا حلم امتلاك مشروعنا الخاص! مفيش مدير عليك، هتعمل اللي تحبه و تشتغل في الأوقات اللي انت عايزها، بس امتلاكك لمشروع مش بالسهولة دي، في أسئلة مهمة اسألها لنفسك قبل البدء في اي مشروع ممكن تكون مش بتفكر فيها دلوقتي

1- انا ليه عايز افتح مشروع ؟

ساعات بنفكر اننا نفتح مشروع بس من غير ما يكون عندنا أسباب واضحة. ايه اللي الهمك بفكرة المشروع و هل انت فعلا مستعد انك تبدأ فيه؟ 

2- هل فكرة المشروع هتحققلي مكسب مالي دلوقتي وفي المستقبل ؟ 

لو كانت الاجابة لأ، لازم تفكر تاني! لأنك مش هتبقى عايز تصرف على المشروع فلوس أكتر من الدخل اللي هتحققه.  صحيح أن الفلوس مش أهم عنصر في المشروع، نقدر نقول أنها محصلة تعبك في المشروع، لكن لازم تضمن أن المشروع يكون ليه مكسب مالي

3- مين الجمهور المستهدف من المشروع؟ 

لازم تخصص لمشروعك جمهور محدد و ده هيفيدك لما تبدأ ف التسويق وانتاج المنتجات حسب احتياجاتهم هم، خليك فاكر ان شغلك مش هيكون لكل الناس لكن لجمهور محدد بس. حدد الجمهور والسوق الصح  وركز عليهم علشان تقدر تحقق الأرباح المطلوبة 

4- مين هم المنافسين ؟ 

في الغالب فكرة مشروعك موجودة بالفعل في السوق بأشكال متنوعة ، علشان كده من المهم جدا أنك تدور على منافسيك في السوق و تدرسهم و تحللهم كويس، راقب تفاعلهم مع العملاء على الانترنت و ازاي بيقدموا خدماتهم و منتجاتهم و قوة علامتهم التجارية علشان تعرف ايه المميز عندك وتقدر تبرزه بشكل افضل 

5- ايه هي نقطة البيع الفريدة ( USP )؟ 

لما تحدد منافسينك و تدرسهم هتقدر تعرف ايه نقطة البيع الفريدة عندك، اسأل نفسك ايه المميز في مشروعك مش موجودة عند باقي المنافسين و ركز عليها 

6- ازاي هسوق لمشروعي؟ 

انت محتاج تسوق منتجاتك لجمهورك المحدد عن طريق عمل أفضل استراتيجية تسويق، زي انك تمتلك موقعك الالكتروني  و منصات التواصل الاجتماعي الخاصة بعملك واللي هيساعد في زيادة وصولك للجمهور المستهدف و بالتالي زيادة المبيعات 

7- ازاي هحدد أسعار منتجاتي؟ 

مش من الأفضل المبالغة  في السعر و كمان السعر مايكونش قليل جدا. هنا دراسة منافسيك هتفيدك بشكل كبير،  اعرف اسعار منافسيك و قارن بينها وبين منتجاتك هل هي نفس المنتجات أو أكتر فخامة أو أقل في الجودة ؟ لازم تاخد في الاعتبار  تكلفة التعبئة و التغليف و الشحن بجانب تكاليف الصيانة بشكل عام، و معرفة ايه هو السوق المناسب علشان توصل لجمهورك المستهدف 

8-  هل معايا فلوس كفاية علشان ابدء في المشروع؟ 

قبل ما تبدأ تكسب فلوس من شغلك هتحتاج أنك تصرف على مشروعك علشان تقدر تنفذه، اعمل قائمة بكل المتطلبات اللي هتحتاج تشتريها لمشروعك قبل ما ينطلق رسميا زي :

• تسجيل اسم شركتك
• موقع إلكتروني 
• المنتج نفسه/ انشاء الخدمة
• التغليف
• الملصقات
• مصاريف التسويق و الدعايا

دي بعض الحاجات اللي هتحتاجها في البداية ، اشتري بس الحاجت الأساسية لمشروعك و بعدين تقدر تبدأ في تطويره لحد ما يوصل للشكل المثالي 

9- هل انا متحمس بشكل كافي؟ 

من السهل جدا تقول انك نفسك يكون ليك مشروعك الخاص، بس انت شايف نفسك تقدر تعمل ده لفترة طويلة؟ أنت متحمس حقيقي لفكرة المشروع و عندك دوافع كبيرة تخليك تشتغل عليه لحد ما تطوره و تكبر معاه؟ 

10- هل هقدر ادير الشغل لوحدي؟ 

محتاج أنك تحدد المهام و الفريق اللي هيساعدك في مشروعك. هل هتقدر تدير الشغل كله لوحدك ولا هتحتاج فريق تقدر تعتمد عليه في رحلتك الطويلة؟ مش من السهل أنك تدير شغل كامل لوحدك علشان كده غالبا هتحتاج لشخص يساعدك ويكون متحمس لفكرة شغلك

11-  كم عدد الموظفين اللي هحتاجهم؟

من المهم أنك تفكر في توسيع مشروعك في المستقبل سواء كنت هتبدأ المشروع بمفردك أو مع شريك تجاري، أنت محتاج أنك تفكر في عدد الموظفين اللي هتحتاجهم مع مرور الوقت، واذا اخترت شركة واحدة فكم عدد الأشخاص اللي هتحتاجهم علشان تقدر تنتنج بشكل كويس 

12- ايه هي الموارد اللي عندي بالفعل؟

ممكن تفكر في الموارد اللي مش عندك، بس قبلها اسأ نفسك ايهالموادر  اللي بتمتلكها بالفعل؟ استخدم كل الموارد المتاحة عندك علشان تقدر توفر اكتر في الوقت والفلوس

13- هل أنا مستعد استثمر وقتي في المشروع ده؟ 

ادارة المشاريع بتاخد كتير من المجهود والوقت و الطاقة علشان تنجح، اتأكد ان حياتك مستقرة بشكل كافي انك تبدأ مشروع. لازم تكون مستعد لتقديم تضحيات ومجهود كبير في سبيل ان مشروعك يكبر و ينجح 

14- ازاي هأسس الوضع القانوني لمشروعي؟ 

من المهم ان تأمن مشروعك بالضوابط القانونية اعتمادا على المنتج او الخدمة اللي بتقدمها. اتأكد من أنك تلاقي الشكل القانوني السليم اللي تحمي بيه مشروعك و نفسك 

15-  ايه نوع الضرائب اللي هدفعها؟

في سؤال مهم لازم تفكر فيه قبل ما تبدأ مشروعك. اعمل دراسة جدوى واحسب أرباحك و على أساسها هيكون الضرائب اللي هتدفعها  للحكومة

16-  ايه هي أهدافي من المشروع؟ 

صح أنت عايز تبدأ مشروعك بس تعرف ايه هي أهدافك منه؟  شايف نفسك فين بعد 10 أو 15 سنة ؟ دي بعض الأفكار اللي لازم تكون تفكر فيها، مشروعك هو هدف طويل المدى اللي في يوم من الأيام هتقدر تعتمد عليه لوحده في دخلك

17- امتى هكون جاهز اني ابدأ؟ 

حدد خطة بالمعاد المثالي اللي هتطلق مشروعك فيه واشتغل على تحقيقه! اعمل قائمة اعمال و حدد المهام المطلوبة منك خلال كل مرحلة، خليك واقعي في خطة الأنطلاق و المهام علشان تقدر تحققها

في أسئلة كتير محتاج تسألها لنفسك قبل ما تبدأ مشروعك ، الأسئلة السابقة ممكن تساعدك تلاقي الأجوبة وتحددها

افتكر ان البدء في مشروعك الخاص هيحتاج لكتير من الوقت والصبر و الطاقة. اقتنع  بفكرة مشروعك  وحبها و راقبها وهي بتكبر وخطط لمستقبل أفضل. تقدر تتعرف أكتر عن نماذج مشاريع ناجحة من هنا

حظ سعيد في رحلتك