قصة التسويق الناجح لهنري هاينز (كاتشاب)

واحدة من أهم قصص التسويق الناجح هي قصة هنري جون هاينز، اللي بدأ حياته بمساعدة والدته في طحن التوابل وزراعة الفجل وغسل وتقطيع وتخليل الخضار، و إضافة النكهة الخاصة بيه وبيعها. هاينز كان مقتنع جدا بفكرة الأكل الجاهز بالرغم من أنها كانت فكرة جديدة في وقتها. فبدأ أول شركة له مع شريكه  “كلارنس نوبل” بإسم هاينز ونوبل في سنة 1869  واللي كانت متخصصة في تعليب الفجل وبعض أنواع الخضار ، وفي السنة الأولى حقق نجاح كبير خصوصا انه متخصص في التخليل والتعليب من طفولته و كمان يعتبر رجل مبيعات من الطراز الأول،  لكن بعد سنين قليلة انهارت اسعار الفجل واللي أثر في شراء العملاء للفجل المعلب، وبالتالي قلة نسبة مبيعات الشركة بشكل كبير واضطر هاينز انه يعلن إفلاسه سنة 1875

لكن هاينز قرر انه مش هيستسلم وبدأ في تأسيس شركة جديدة ، والمرة دي مع اخوه بإسم “اف و جيه هاينز”وكانت متخصصة في تصنيع منتج جديد “الكاتشاب” اللي نجح نجاح ساحق لأن السوق كان متعطش لمنتجات مختلفة زي دي، وقدر هاينز انه يشتري نصيب اخوه في الشركة علشان يكون اسم الشركة H.J Heinz سنة 1888. كان نجاح الشركة مبني تماما على الطماطم لكن خبرة هاينز علمته انه مايعتمدتش على منتج واحد بس، فقرر انه يبدأ في تصنيع منتجات جديدة زي المخللات والخل والجيلي والمربي وكمان الصوص الحار وشوربة الطماطم والبصل

 الأكل المعلب كان فكرة جديدة في الوقت ده فكان بيقابل الناس بعض القلق من نظافة الأكل. لكن هاينز كان صارم جدا في فكرة نضافة مصانعه و جودة الخضروات اللي بيستخدمها في التخليل والتعليب، وكان دايما بيرحب بأي تفتيش حكومي على المصانع، و علشان يطمن الناس اكتر قرر انه كل منتجاته هتكون في زجاجات شفافة علشان الناس تقدر تشوف نظافة المنتج وكمان حجم التعبئة.  هاينز قدر يبني لنفسه ولشركته سمعة طيبة وشهرة واسعة بسبب الإجراءات دي واللي اكيد أثرت بشكل إيجابي على المبيعات ومكاسب الشركة

 أفكار التسويق الناجح لهنري هاينز

هنري مش بس رجل صناعة عظيم لكن رجل تسويق من الدرجة الأولى، فكانت له بعض الأفكار التسويقية المختلفة والرائدة في العصر ده زي:  

شارك في معرض شيكاجو العالمي سنة 1893 و كان عارف أهمية المعرض ده وانه لو نجح في بيع منتجاته هيحصل طفرة كبيرة لشركته ، بس لما راح محدش كان بيشتري منتجاته لأن موقعه في المعرض كان بعيد عن العملاء، فقرر انه هيخلي الناس تيجي لحد عنده عن طريق طباعة كوبونات وتوزيعها وتقديم عرض ” أي عميل هيقدم الكوبون ده هياخد دبوس معدني على شكل خيار مخلل هدية”، والنتيجة إنه عرف يوزع مليون ميدالية وبسبب الفكرة دي مش بس كسب عملاء كتير هو كمان نجح يكون  حديث الجرايد والمجلات لفترات طويلة

بعد المعرض ب 3 سنين طلع بفكرة الشعار الإعلاني الشهير بشركة هاينز“Varieties 57” عشان يوصل فكرة إن الشركة بتقدم منتجات كتير بالرغم من أنه منتجاته كانت اكبر من الرقم ده ولكنه كان مجرد رقم بيتفائل بيه هو ومراته

هاينز كان أول حد يعلق لوحة إعلانية مضاءة بالمصباح الكهربائي في أشهر وأرقى أحياء نيويورك وده كان يعتبر اختراع جديد في الوقت ده

 كان أول صاحب مصنع بينظم رحلات لمصنعه عشان الناس تيجي تشوف الطريقة الصحية من تنضيف وتقطيع وحفظ المنتجات اللي بيصنعها

 هنري هاينز توفى سنة 1919 وكان عمره 74 سنة، شركته في وقت وفاته كانت بتضم فريق عمل ضخم بيتكون من 6500 موظف، وبتمتلك 25 مصنع و40 ألف فدان من الخضروات بيتم توزيع منتجاتها حول العالم

 ببعض الأفكار التسويقية المختلفة تقدر تخلق لمشروعك مكان مميز اضغط هنا علشان تشوف قصص أكتر عن أهمية التسويق الناجح